Kamakau Makahiki Close

Ma ka panina ʻana o ka wā makahiki, eia mai ka hoʻolauleʻa makahiki Kuilima e mālama ʻia ana i kēia hopena pule ma ka hōkele ʻo Turtle Bay e ke kula hōʻāmana ʻo Samuel Manaiakalani Kamakau .

“O kēia kekahi o nā hoʻolauleʻa makahiki hoʻokahi paha i hoʻonani ʻakahi ʻia ia mau manaʻo o ka hōlua a me kekahi hoʻokūkū kai, kekahi mea i pili i kai. No laila ʻano pīhoihoi mākou e ʻike pehea e launa ai kēia mau mea a pau,” wahi a ka hope kahu ʻo Kamehaʻililani Waiau.

ʻO kekahi mea e pīhoihoi ai ka lehulehu, ʻo ia hoʻi ka lanakila ʻana i ka $20,000.

“E huki ʻia ana ʻehā likiki, ʻehā inoa no ka hiki ke hoʻokūkū i ka ulu maika, ʻelua poʻe hoʻokūkū ana no ka ulu maika, ʻelua poʻe e hoʻokūkū ana no ka ʻōʻō ihe i hiki ke paio no ia lanakila o kēnā kālā he nui wale,” wahi a Kamehaʻililani.

Akā ma kahi o ka lanakila ʻana i kahi puʻu kālā, i kona manaʻo, he lanakila nui hou aku ko kēia hanana i pili i ke ʻano nohona Hawaiʻi.

“I loko o ka haʻawina kula, i loko pū o ka haʻawina ola, a pēlā aku, a laila he wā kēia e launa ai a hoʻolauleʻa pū ai a mahalo i nā mea i loaʻa.”

A ʻaʻohe hōʻole ko ia makua haʻaheo nei, ʻo Pōhaku Stone. “Inā mahalo kākou i ka mea loaʻa, ua loaʻa kēlā kahua e ulu aʻe ai.”

“He wahi kono kēia i nā kānaka a pau o ka mokupuni nei e nau mai, e hele mai, launa pū mai me mākou nā ʻohana o ke kula ʻo Kamakau,” wahi a Kamehaʻililani.

No laila, i mea e kākoʻo i ka hoʻoulu mau ʻana i ka ʻike kuʻuna ma waena o ia mau keiki a me kākou like, e kipa aku i ka ʻohana Kamakau ma Turtle Bay i kēia Poʻaono a Lāpule mai ka hola ʻumi o ke kakahiaka a i ka hola ʻekolu o ke awakea.

With the closure of this makahiki season, S. M. Kamakau will host their Kuilima celebration this weekend at Turtle Bay.

“This is probably the only makahiki celebration incorporating hōlua sledding and a water sport. So we’re really excited to see how it turns out,” says Kamehaʻililani Waiau, who is the administrator assistant at S. M. Kamakau.

Another thing to be excited about is a chance to win the $20,000 prize.

“Four raffle tickets will be drawn for four people to each compete at ulu maika and ʻōʻō ihe in an effort to win the big bucks,” says Kamehaʻililani.

However, besides the money, she believes that a greater victory lies in our Hawaiian way of living.

“Among school and life lessons, this is a time for families to mingle and give thanks to all the many blessings.”

And Pōhaku Stone, a proud parent of S. M. Kamakau, couldn’t agree more. “If we embrace our own things and our own ways, then we actually have something to grow off of.”

“This is an invitation to everyone on island to join in on the festivities that S.M. Kamakau has to offer,” says Kamehaʻililani.

So in an effort to continue this life-long learning of ancestral knowledge for these kids, visit the Kamakau ʻohana at Turtle Bay this Saturday and Sunday from 10:00 a.m. to 3:00 p.m.